Nakumpiska ng mga operatiba ng Jolo Municipal Police Station ang P34,000 na halaga ng shabu mula sa dalawang mga dealers na na-entrap nitong gabi ng Linggo, April 21, 2024, sa isang liblib na lugar sa Barangay Busbus sa Jolo, Sulu. Agad na inaresto sina Alkaiser Amistoso Alsid, 42-anyos, at ang 25-anyos na si Nasran Karamon Alipal ng mga pulis na kanilang nabentahan ng P34,000 na halaga ng shabu sa Sitio Laud-Laud sa Barangay Busbus. Sila ay nasa kustodiya na ng Jolo Municipal Police Station at nahaharap na sa kaukulang kaso, ayon sa sa police chief ng Jolo, si Lt. Col. Annidul Sali. (April 22, 2024) Photo: Busbus Busted

Nakumpiska ng mga agents ng Philippine Drug Enforcement Agency ang P6.8 million na halaga ng shabu sa dalawang dealers na na-entrap kamakalawa sa Barangay Saduc sa Marawi City sa probinsya ng Lanao del Sur.Kinumpirma nitong Lunes, April 22, 2024, ni Gil Cesario Castro, director ng PDEA-Bangsamoro Autonomous Region in Muslim Mindanao, na nakakulong na ang dalawang suspects, sina Abdul Diongaan at Panarigan Radia, nalambat sa tulong ng mga local executives, kabilang sa kanila si Lanao del Sur Gov. Mamintal Adiong, Jr.Ayon kay Castro, agad na inaresto sina Diongaan at Radia ng mga mga operatiba ng PDEA-BARMM matapos magbenta sa kanila ng isang kilong shabu, nagkakahalaga ng P6.8 million, sa isang entrapment operation sa isang liblib na pook sa Barangay Saduc na suportado ng ibat-ibang units na nasa pamumuno ni Bangsamoro regional police director Brig. Gen. Prexy Tanggawohn.Nasa kustodiya na ng PDEA-BARMM sina Diongaan at Radia, nahaharap na sa kasong paglabag sa Comprehensive Dangerous Drugs Act of 2002, ayon kay Castro. (APRIL 22, 2024)

Na-aresto na ng mga pulis at kusang loob ng umamin sa nagawang krimen ang isang lalaki na pumatay ng isang 11-anyos na batang babae matapos niyang gahasain diumano sa Barangay Pangandao sa Manukan, Zamboanga del Norte nitong April 16, 2024.Kinumpirma ng mga opisyal ng Manukan Municipal Police Station nitong Lunes na nakapiit na ang suspect na si Melvin Gumelok, 20-anyos, na natunton at na-aresto sa isang liblib na lugar sa naturang bayan sa tulong ng mga impormanteng alam ang kanyang pinagtataguan.Natagpuan ng mga residente ang bangkay ng batang babae na pinatay, si Janeth Falconite Upod, isang Grade 4 pupil ng Pangandao Elementary School, sa isang mababaw na hukay sa bakanteng lote sa Barangay Pangandao dalawang araw mula ng siya ay naiulat ng kanyang mga kamag-anak sa pulisya na nawawala.Ayon sa Manukan MPS at sa Zamboanga del Norte Provincial Police Office, nahaharap na sa mga kaukulang kaso si Gumelok, na humingi na ng tawad sa pamilya ni Upod sa kanyang nagawang krimen. (April 22, 2024)

Agad na namatay sa mga tama ng bala ang isang residente ng Barangay Panubigan sa Zamboanga City, pansamantalang kinilala lang ng mga kapitbahay na Rey, biktima ng pamaril nitong gabi ng Linggo, April 21, 2024.Sa inisyal na ulat ng Zamboanga City Police Office at ng mga barangay officials, naglalakad si Ray Tallo, 30 anyos, sa isang lugar sa Sitio Mala sa Barangay Panubigan ng lapitan ng mga armado at agad na pinababaril sa ulo na nagsanhi ng kanyang agarang kamatayan. Ayon sa mga barangay officials sa Panubigan, mabilis na nakatakas ang mga pumatay sa biktima. Natagpuan ng nga kasapi ng Zamboanga City Police Precinct 2, na nag-responde sa insidente, sa tabi ng bangkay ni Tallo ang kanyang sling bag na may lamang cellphone at shabu na sa kanilang tantya ay hindi bababa sa P6,800 ang halaga.Matagal ng pinagdududahan ng mga residente ng Barangay Panubigan na dealer ng shabu ang napaslang na si Tallo. (April 22, 2024)

Dalawang mga dealers ng shabu na nagbebenta ng kanilang illegal na epektos malapit sa mga paaralan ang naaresto ng mg pulis sa isang entrapment operation nitong Biyernes sa Barangay Limbo sa Sultan Kudarat, Maguindanao del Norte nitong Biyernes, April 19, 2024.Kinilala ng mga barangay officials ang mga suspects na sina Born Salik Mangacop, 40-anyos, at ang kasabwat na babaeng si Koraima Maliga, 55-anyos, na ayon sa kanila ay nalambat ng mga pulis na pinamunuan ng kanilang municipal police chief na si Lt. Col. Esmael Madin.Sa ulat nitong Lunes ng umaga, kinumpirma ni Madin na nasa kustodiya na nila ang dalawang suspects na agad na inaresto matapos magbenta ng P5,508 na halaga ng shabu sa kanilang mga hindi unipormadong operatiba sa isang entrapment operation sa Sitio Torres sa Barangay Limbo.Ayon kay Madin, naikasa ang naturang matagumpay na entrapment operation sa tulong ng ibat-ibang mga units ng Maguindanao del Norte Provincial Police Office at mga impormante, ilan sa kanila mga traditional Moro leaders na sumusuporta sa anti-narcotics campaign ng Sultan Kudarat MPS. (April 22, 2024)

Nasamsam ng mga pulis ang P102,000 na halaga ng shabu mula sa isang dealer na taga Datu Piang, Maguindanao na na-entrap sa Barangay Poblacion 7 sa Midsayap, Cotabato nitong Sabado, April 20, 2024.Sa pahayag nitong Lunes ni Lt.Col. John Miridel Calinga, hepe ng Midsayap municipal police, nasa kustodiya na nila ang suspect na si Tokel Kadatuan, 31-anyos, na residente ng hindi kalayuang Barangay Balanakin sa Datu Piang, Maguindanao del Sur.Agad na inaresto ng mga hindi unipormadong mga kasapi ng Midsayap Municipal Police Station si Kadatuan matapos magbenta sa kanila ng P102,000 na halaga ng shabu, ayon kay Calinga. (April 22, 2024)

Dahan-dahan ng nanunumbalik ang kaayusan sa Barangay Matilac sa Pigcawayan, Cotabato matapos mag-ayos ang dalawang armadong grupong Moro na ilang beses na nagbarilan at nakapatay sa bawat panig sa mga engkwentrong nagpahirap sa buhay ng daan-daang mga inosenteng pamilya. Sa pahayag nitong Linggo, April 21, 2024, ni Major Gen. Alex Rillera, commander ng 6th Infantry Division, kusang nag-distansya na sa isat-isa ang dating mortal na magkaaway na mga grupo nila Tong Talusan at Ebrahim Piang, parehong mga commander ng Moro Islamic Liberation Front, sa pakiusap ng mga local leaders at mga opisyal ng 6th ID na nagsisikap na mapalagda sila sa isang kasunduang wakasan na ng tuluyan ang kanilang madugong sigalot.Nag-ugat ang kanilang “rido,” o Moro clan war, sa agawan ng mga teritoryo at mga away pulitika na nauwi sa mga serye ng madugong labanan gamit ang mga assault rifles at grenade launchers nitong nakalipas na ilang buwan na nagsanhi sa pagkasawi ng mahigit 10 sa bawat panig. Ayon kay Rillera, bagama’t sakop ng Bangsamoro region ang barangay Matilac, isa sa 63 Bangsamoro barangays sa ibat-ibang bayan sa Cotabato na nasa ilalim ng Region 12, malaki ang naging ambag ng administrasyon ni Cotabato Gov. Emmylou Taliño Mendoza sa pag-areglo ng away nila Talusan at Piang. Pinasalamatan nitong Linggo ni Rillera ang Cotabato provincial government, mga traditional Moro leaders at ang mga namumuno ng mga unit ng 6th ID sa kanilang magkatuwang na inisyatibong mapagkasundo na sina Talusan at Piang, parehong mga opisyal ng mga 104th at 105th Base Command ng MILF, ayon sa pagkakasunod. Makikita sa larawan ang isa sa mga dayalogo ng militar at mga pinuno ng dalawang grupong nagresulta sa pagkaka-areglo ng kanilang madugong rido nito lang nakalipas na linggo. (APRIL 21, 2024)

Magkatuwang na pinaghahanap na ng mga kasapi ng Lamitan City Police Station at ng mga tropa 101st Infantry Brigade ang mga armadong nag-ambush sa isang Yakan na magsasaka sa Barangay Bohe Bessey sa Lamitan City, Basilan nitong Sabado, April 20, 2024.Agad na namatay sa mga tama ng bala sa ulo at katawan ang ambush victim na si Wahid Jalal, 26-anyos, ng tambangan ng mga armadong pinamumunuan ni Nulhin Arabin sa isang lugar sa Sitio Sabana sa Barangay Bohe Bessey.May mga saksi na nagturo kina Arabin na siyang responsible sa naturang pananambang, ayon sa pahayag nitong Linggo, April 21, 2024, ni Lamitan City police chief Lt. Col. Arlan Delumpines.Ayon sa mga imbestigador ng Lamitan City police, may matinding alitan sina Arabin at ang ang kanilang napaslang na si Jalal. Makikita sa larawan ang mga imbestigador ng lokal na pulisya at mga sundalo habang patungo sa kung saan napatay si Jalal upang mag-imbestiga. (April 21, 2024)

Dalawang residente ng Cotabato City ang sugatan sa isang ambush Barangay Rosary Heights 5 sa lungsod nitong gabi ng Biyernes.Sakay ng isang sports utility vehicle ang mga biktimang sina Misuari Tatak, 49-anyos, at kasamang 25-anyos na si Datu Akbar Maulana, ng pagbabarilin ng mga armadong kalalakihing naka puwesto sa isang bahagi ng 5th Road sa Barangay Rosary Heights 5 sa Cotabato City.Sa ulat ni Cotabato City police director Col. Querubin Manalang, Jr., nagtamo ng mga tama ng bala sina Tatak at Maulana na agad naman naisugod sa pagamutan ng mga barangay officials at mga kasapi ng Cotabato City Police Precinct 2 na nag-responde sa insidente.Ayon kay Manalang, may mga testigong kinilala na sa mga imbestigador ang mga nag-ambush kina Tatak at Maulana, ngayon pinaghahanap na ng mga intelligence agents ng Cotabato City Police Office. (April 20, 2024)

May theorya ang mga imbestigador na posibleng ginahasa muna bago pinatay at inilibing ang 11-anyos na si Janeth Falconite Upod na nawala noong April 16, 2024 at, makalipas ang tatlong araw, nadiskubreng nakalibing sa isang mababaw na hukay sa bakanteng lote sa Barangay Pangandao sa Manukan, Zamboanga del Norte.Si Upod ay isang Grade 4 pupil ng Pangandao Elementary School sa naturang barangay, naiulat ng mga kamag-anak sa kanilang barangay officials at sa Manukan Municipal Police Station na nawawala nitong Martes.Ilang mga residente ang naka-diskubre ng mababaw na hukay sa isang liblib na lugar sa Barangay Pangandao kung saan siya inilibing ng diumano tumangay at gumahasa sa kanya. (April 20, 2024)