Isang junior high school student ang bumaril at nakapatay sa kanyang kaklase gamit ang isang pistola bago nagbaril sa sarili at namatay sa loob ng campus ng Ateneo de Zamboanga University (AdZU) sa Barangay Tumaga, Zamboanga City, nitong Martes ng umaga, Agosto 18.

Ayon sa mga lokal na opisyal at mga imbestigador ng Zamboanga City Police Office, kinilala ang suspek na si Mohammad Abel Jalani, na armado ng isang pistola at isang maikling combat rifle.

Batay sa paunang imbestigasyon, pumasok si Jalani sa isang silid-aralan sa ikaapat na palapag ng isang gusali sa loob ng campus at biglang nagpaputok sa mga Grade 8 student. Napatay sa insidente ang kanyang kaklaseng si Patrick Dylan Wee, na kabilang sa isang kilalang Chinese family sa Zamboanga City.

Nagdulot ng matinding takot at kaguluhan ang sunud-sunod na putok ng baril, dahilan upang magtakbuhan ang mga estudyante palabas ng mga silid-aralan.

Matapos ang pamamaril, bumaba umano si Jalani sa ikatlong palapag ng gusali at doon binaril ang sarili gamit ang isang pistola. Agad siyang namatay sa lugar.

Ayon sa mga ulat sa radyo, ang ama ni Jalani ay isang senior official ng Bureau of Customs sa Region 9, at nakapasok umano ang estudyante sa campus na may dalang dalawang baril.

Sa paunang ulat ng mga pulis na pinamumunuan nina Major Napoleon Velasco, hepe ng Zamboanga City Police Station 7 na may sakop sa Barangay Tumaga, at Lt. Romeo Ocampo Jr., nakarekober ang mga awtoridad ng tig-isang Glock 9mm pistol mula kina Jalani at Wee.
Gayunman, sinabi ng malalapit na kaibigan at kamag-anak ni Wee na hindi ito marahas na tao at kilala bilang magalang at palakaibigan. Anila, mahirap paniwalaan ang pahayag na armado siya sa oras ng insidente.

Kinumpirma rin sa mga ulat na si Wee ay nagmula sa isang Chinese family na nagmamay-ari ng mga lehitimong malalaking negosyo sa Zamboanga City.

Ayon sa ilang estudyanteng nakasaksi sa pangyayari, malamang na si Jalani mismo ang nagpasok ng dalawang pistola at ng combat rifle na ginamit niya sa pag-atake sa kanilang silid-aralan.

Sinabi rin ng mga testigo na ang unang pistolang ginamit ng suspek ay nag-jam, at posibleng iyon ang baril na natagpuan malapit sa bangkay ni Wee. (AUGUST 18, 2026)