Dalawang sakay ng isang motorsiklo ang nagtamo ng mga pasa at sugat sa katawan ng kanilang mabangga ang kanang gilid ng isang van sa isang highway intersection sa Koronadal City nitong umaga ng Lunes, June 24, 2024.Batay sa mga inisyal na ulat ng Koronadal City Police Office, ang motorsiklong kulay blue na Suzuki Raider ang siyang bumangga sa gilid ng van habang paliko ito, pa-kanan, sa isang kanto sa tabi ng GenSan Drive, ang highway na nag-uugnay sa Koronadal City at sa General Santos City.Agad namang naisugod sa pagamutan ang mga nasaktang motorista ng mga emergency responders ng Koronadal City local government unit at ng mga pulis na nag-responde sa insidente. (JUNE 24, 2024, HANDOUT PHOTOS)

Malubha ang isang motorista sanhi ng banggaan ng kanyang motorsiklo at ng isang minivan sa isang bahagi ng highway sa Lanao sa Kidapawan City sa probinsya ng Cotabato nitong hapon ng Linggo, June 23, 2024. Inaantabayanan pa ang ulat ng Kidapawan City Police Office hinggil sa insidente. Abangan ang dagdag pang detalye. (JUNE 23, 2024)

Dahil sa paulit-ulit na malakas na ulan sa kapaligiran, lubog sa baha nitong hapon ng Biyernes, June 21, 2024, ang bahagi ng Kidapawan-Davao Highway sa boundary ng Makilala, Cotabato at Bansalan, Davao del Sur. (JUNE 21, 2024)

Pumanaw sa isang hospital sa Zamboanga City madaling araw nitong Biyernes ang isang kasapi ng Philippine Coast Guard na Yakan na nabaril sa Lamitan City, Basilan nitong hapon ng Huwebes.Kinumpirma nitong tanghali ng Biyernes ng Lamitan City Police Station at ng Basilan Provincial Police Office ang pagkamatay ng PCG member Nurjan Ijal Birong, 26-anyos at taga Akbar, Basilan sanhi ng mga tama ng bala sa kanyang kaliwang braso na tumagos sa tagilirang bahagi ng kanyang dibdib.Sa inisyal na ulat nitong Huwebes in Lt. Col. Arlan Delumpines, police chief ng Lamitan City, naglalakad si Birong, naka destino sa Ormoc City, at ang kanyang 25-anyos na kasintahang si Mudzrika Gayot Aman sa isang lugar sa Barangay Maligaya ng siya ay pagbabarilin ng isang lalaking nakaabang sa gilid ng daan na mabilis na tumakas gamit ang isang motorsiklo.May theorya ang mga local government officials ng Akbar, hindi kalayuan sa Lamitan City, na kababayan din nila ang bumaril kay Birong, isang krimen na posibleng nag-ugat diumano sa personal grudge.Unang dinala sa Lamitan City District Hospital si Birong at isinugod sa isang mas modernong pagamutan sa Zamboanga City dahil sa kanyang maselang kalagayan at doon na namatay habang ginagamot ng mga doctor nitong madaling araw ng Biyernes. (JUNE 21, 2024)

Mahigit 30 na mga barangay sa ilang bayan sa Cotabato province sa Region 12 at mga karatig na bayan sa Maguindanao del Sur sa Bangsamoro region na malapit sa 220,000 ektaryang Ligawasan Marsh ang binaha mula pa nitong madaling araw ng Huwebes.Kabilang sa mga lugar na binaha ang Barangay Buliok sa bagong tatag na bayan ng Ligawasan sa Bangsamoro Autonomous Region at ilan pang mga lugar sa Pikit, Cotabato na tinataguriang “gateways to Liguasan Marsh” dahil sa malapit ang mga ito sa naturang marsh na bagsakan ng tubig mula sa mga ilog sa mga kabundukan sa mga probinsyang nakapalibot dito.Nagsimulang umapaw ang tubig sa Liguasan Marsh madaling araw ng Huwebes kasunod ng Malakas na ulan sa mga probinsya sa paligid nito. (JUNE 21, 2024)

Nakumpiska ng mga pulis ang abot sa P523,000 na halaga ng sigarilyong mula sa Indonesia sa mga hiwalay na anti-smuggling operations sa Sulu at Tawi-Tawi nitong Huwebes.Sa pahayag nitong Biyernes ni Brig. Gen. Prexy Tanggawohn, director ng Police Regional Office-Bangsamoro Autonomous Region in Muslim Mindanao, nasamsam ng kanilang mga operatiba ang P148,000 na halaga ng mga imported na sigarilyo mula sa ilang mga tindahan sa Barangay Poblacion sa Bongao, kabisera ng Tawi-Tawi.Kusang loob namang ipinakustodiya na sa Bongao Municipal Police Station ng mga negosyante ang mga imported na sigarilyong kanilang binebenta ng maipaliwanag sa kanila ng mga magkasanib na mga kasapi ng Bongao Municipal Police Station at ng Tawi-Tawi Provincial Police Office na bawal ang pagbebenta ng mga imported na sigarilyo ng walang kaukulang pahintulot sa pamahalaan.Unang nakumpiska nitong Huwebes ng mga pulis ang abot sa P375,000 na halaga ng sigarilyong ibat-iba ang mga brand na gawa sa Indonesia na nakaimbak sa malapit sa isang dungguan ng mga maliliit na sasakyang pandagat sa Barangay Tulay sa Jolo, kabisera ng Sulu.Ang naturang kontrabando ay nakatakda na sanang ihahatid ng mga smugglers sa ilang mga tindahan sa Jolo ngunit iniwan na ng mga ito ng napansin na may parating na mga pulis mula sa Jolo Municipal Police Station na naatasang magsiyasat sa ulat ng mga residente hinggil pagdaung sa maliit na pier sa kanilang barangay ng isang bangkang de-motor na may kargang smuggled na mga sigarilyo. (JUNE 21, 2024)

Mahigit 200 na mga taga Datu Unsay, Maguindanao del Sur ang nagsilikas sa mga ligtas na lugar nitong Miyerkules sanhi ng barilan ng dalawang grupong kabilang sa Moro Islamic Liberation Front na nanunog pa ng ilang mga bahay bago tumakas ng papalapit na ang mga sundalong nagresponde sa insidente.Sa mga hiwalay na ulat nitong Huwebes ng 6th Infantry Division at the Police Regional Office-Bangsamoro Autonomous Region, grupo ng magkalabang sina Commander Panzo at Commander Tunga ang nagka-engkwentro sa Sitio Irrigation sa Barangay Meta, Datu Unsay na siyang nagsanhi ng paglikas ng mga inosenteng mga residenteng naipit sa kaguluhan.Sa ulat ng pulisya at ng mga units ng 6th ID sa Maguindanao del Sur, kabilang sa mga dahilan ng away ng dalawang grupo ang bangayan sa pulitika at agawan ng mga teritoryo.Si Panzo ay kasapi ng 118th Base Command ng MILF habang si Tunga ay kabilang naman sa mga MILF commanders na miyembro ng 105th Base Command ng naturang grupo.Nanawagan nitong umaga ng Huwebes si Major Gen. Alex Rillera, commander ng 6th ID, at si Bangsamoro regional police director Brig. Prexy Tanggawohn sa liderato ng MILF at sa mga opisyal ng joint ceasefire committee ng naturang grupo at ng pamahalaan na ayusin ang sigalot ng dalawang magkaaway na mga commanders. (JUNE 20, 2024)

Nanawagan ng malalim na imbestigasyon ang mga taga Lamitan City sa pambobomba ng isang gasoline station sa lungsod nitong gabi ng Martes, kumbinsidong may nais mapahiya ang mga opisyal na nagdeklarang Abu Sayyaf-free na ang 45 barangays na sakop nito. Pinasabugan ng homemade na bomba ang gasoline station sa Barangay Matibay kasunod ng State of the City Report ni Lamitan City Mayor Roderick Furigay nitong umaga ng Martes kung saan idineklara nila Basilan Gov. Hadjiman Salliman at ng mga opisyal ng 101st Infantry Brigade at ng Basilan Provincial Police Office na wala ng presensya ng Abu Sayyaf sa lungsod. Isang menor-de-edad na residente ang bahagyang nagalusan sa pambobomba, ayon sa ulat nitong Miyerkules ni Lt. Col. Arlan Delumpines, Lamitan City police chief, na nagpahayag din na may paniwala silang mga extortionists ang may pakana nito at hindi mga teroristang Abu Sayyaf. Naniniwala ang mga barangay officials sa Lamitan City, kilalang mga political supporters ni Salliman, na hindi mga Abu Sayyaf ang nasa likuran ng naturang pambobomba at posible diumanong may grupo lang na nais mapahiya ang mga local executives, si Salliman at mga opisyal ng Basilan PPO at 101st Infantry Brigade sa kanilang magkatuwang na deklarasyon na wala ng ni isa mang Abu Sayyaf sa lungsod. Una ng nadeklara nito lang June 4 ng mga kinauukulan, kabilang sina Salliman, si Brig. Gen. Alvin Luzon ng 101st Infantry Brigade, at ang mga opisyal ng Basilan provincial police, bilang Abu Sayyaf-free ang bayan ng Lantawan, mga 50 kilometro ang layo mula sa Lamitan City. (JUNE 19, 2024)

Pinatay na sa 17 na saksak at ginilitan pa ng leeg ang isang ginang ng kanyang kagalit na bayaw sa isang karumaldumal na insidente sa Barangay Ilomavis sa Kidapawan City sa probinsya ng Cotabato nitong Sabado, June 15, 2024.Sa pahayag nitong Martes ni Col. Gilbert Balneg Tuzon, director ng Cotabato Provincial Police Office, matagal ng may alitan ang biktima, si Sharon Rose Lapis, 45-anyos, at ang 40-anyos na suspect na si Julie Solilom.Sa ulat ni Jimmy Mantawil, chairman ng Barangay Ilomavis, unang nagtalo dalawa bago naganap ang insidente sa isang lugar sa Sitio Anitap sa Ilomavis. Ayon sa kay Mantawil at mga imbestigador ng Kidapawan City Police Office, sinaksak ng 17 beses in Solilom ang bayaw niyang si Lapis ay ginilitan ng na leeg bago tumakas.Magkatuwang na hinahanap na ng mga operatiba ng Kidapawan City CPO at ng Cotabato PPO si Solilom, ayon kay Tuzon. (JUNE 18, 2024)

Abot sa 1,374 na mga residente, marami sa kanina mula sa tribong Blaan, ng Malungon, Sarangani at Kiblawan, Davao del Sur ang nakabenepisyo sa mga serye ng medical at dental missions ng kanilang mga municipal governments at ng isang pribadong kumpanya, ang Sagittarius Mines Incorporated, nitong nakalipas na ilang linggo.Sa ulat ng ibat-ibang mga himpilan ng radyo sa Central Mindanao nitong Martes, nagpasalamat sina Kiblawan Mayor Joel Calma at Malungon Mayor Maria Theresa Constantino sa Sagittarius Mines Incorporated (SMI) sa isinagawa nitong medical and dental missions sa kanilang mga bayan, katuwang ang kanilang mga local government units.Sinuportahan din ng regional at provincial officials ng National Commission on Indigenous People sa Region 12 at Region 11 ang mga serye ng outreach missions ng SMI at ng mga LGUs ng Kiblawan at Malungon.Sa tala ng mga opisyal ng Kiblawan at Malungon LGUs, abot sa 1,374 na mga residente sa dalawang bayan, marami sa kanila mga Blaan, ang nasuri ng mga health workers at nabigyan ng mga gamot para sa ibat-ibang karamdaman at marami din ang nabunutan ng mga sirang ngipin ng libre ng mga dentista.Malaking bilang din ng mga batang lalaki ang natuli ng libre ng mga manggagamot bilang isa sa joint humanitarian outreach missions ng NCIP, ng mga LGUs ng Malungon at ng SMI, ayon sa mga ulat ng ibat-ibang himpilan ng radyo sa Region 12 at sa Bangsamoro region nitong umaga ng Martes.Ilang Blaan tribal leaders, kabilang si Fulong Rufino Dianga, Jr., Indigenous People’s Mandatory Representative sa konseho ng Kiblawan, ang nagpahayag ng kagalakan sa naging resulta ng naturang humanitarian missions ng SMI at ng mga LGUs ng Malungon at Sarangani at ng NCIP. (JUNE 18, 2024)