Tatlong parangal mula sa National Nutrition Council ang tinanggap ng administrasyon ni Mayor Rolly Sacdalan ng Midsayap sa probinsya ng Cotabato kaugnay ng mabuting pamamalakad nito ng nutrition programs para sa ikakabuti ng mga residente ng naturang bayan.
Tinanggap ng mga opisyal ng Midsayap local government unit ang naturang mga special citations, o mga parangal, sa isang seremonya nitong Biyernes, August 16, 2024, sa Greenleaf Hotel sa General Santos City, inorganisa ng National Nutrition Council 12.
Ginawaran ang Midsayap local government unit ng NNC 12 ng Green Banner Seal of Compliance bilang pagkilala sa satisfactory performance nito sa pagpapalaganap ng nutrition programs, umani ng 86.46 percent rating ayon sa Monitoring and Evaluation of Local Level Plan Implementation Protocol na ipinapatupad ng ahensya.
Nabigyan din ng NNC 12 ang Midsayap LGU ng White Heron Award batay sa epektibong pagbaba, dahil sa mga municipal nutrition programs nito, ng mga kaso ng child stunting, o pagkabansot ng mga bata sa mga barangay nito, mula sa pagka-sanggol hanggang limang taong gulang.
Ang pangatlong award ng Midsayap LGU mula sa NNC 12 ay kaugnay ng pagkakaroon nito ng tinaguriang Most Improved Electronic Operation Timbang Coverage, pinakabukod-tangi sa buong unang distrito ng probinsya ng Cotabato at bilang pagkilala sa pagtatag nito ng “Human Milk Hub,” isang proyektong naglalayong maging malusog ang mga kabaatan sa lahat ng barangay na sakop nito. (AUGUST 18, 2024)
